Fl-2022, Malta nediet l-ewwel Strateġija u Pjan ta’ Azzjoni għall-Ugwaljanza u l-Integrazzjoni tal-Ġeneru (GEMSAP) 2022 – 2027. GEMSAP jirrikonoxxi li s-soċjetà ma tistax tilħaq il-potenzjal sħiħ tagħha mingħajr ma tippermetti li kull persuna jirnexxielha tasal daqs ħaddieħor, mingħajr ostakli bbażati fuq il-ġeneru. Għaldaqstant, din l-Istrateġija għandha l-għan li tidentifika u telimina dawk l-ostakli billi ssaħħaħ il-perspettiva tal-ġeneri f’kull livell u stadju tat-tfassil ta’ politika.

GEMSAP jiffoka fuq tmien għanijiet strateġiċi:

1. Li jsaħħaħ il-Mekkaniżmi Istituzzjonali għall-Integrazzjoni u l-Ugwaljanza tal-Ġeneru
2. Li jiggarantixxi aċċess indaqs għall-impjiegi fis-setturi kollha, jegħleb il-ġlieda kontra s-segregazzjoni u jiżgura paga ndaqs għal xogħol tal-istess valur.
3. Li jtejjeb l-indipendenza ekonomika tan-nisa
4. Li jsaħħaħ il-prinċipju tal-ugwaljanza bejn il-ġeneri u l-integrazzjoni fis-sistema edukattiva u jegħleb l-isfida għall-isterjotipi tal-ġeneru
5. Li jippromwovi ir-responsabbiltà konġunta u l-bilanċ bejn ix-xogħol, il-ħajja privata u l-familja.
6. Li jikseb bilanċ bejn il-ġeneri fit-teħid ta’ deċiżjonijiet politiċi u pubbliċi
7. Li jippromwovi l-ugwaljanza bejn il-ġeneri fil-politiki dwar is-saħħa u l-benesseri soċjali
8. Li jelimina l-iżbilanċ bejn il-ġeneri fil-qasam tal-ġustizzja billi jindirizza il-preġudizzji u l-isterjotipi tal-ġeneru

Aktar informazzjoni dwar GEMSAP tista’ tinstab hawn.

Kumitat Interministerjali twaqqaf fil-bidu tas-sena, peress li dan il-Pjan ta’ Azzjoni għandu jiġi implimentat mill-Ministeri kollha. Id-Direttorat għad-Drittijiet tal-Bniedem huwa l-korp koordinattiv u ta’ monitoraġġ.