STRATEĠIJA GĦALL-UGWALJANZA TAL-ĠENERU 2020-2025
Il-President tal-Kummissjoni Ewropea, Ursula von der Leyen, qalet: “L-ugwaljanza bejn il-ġeneri hija prinċipju ewlieni tal-Unjoni Ewropea, iżda għadha mhix realtà. Fil-kummerċ, fil-politika u fis-soċjetà kollha kemm hi, nistgħu nilħqu l-potenzjal sħiħ tagħna biss jekk nużaw it-talenti u d-diversità kollha tagħna. Li tuża biss nofs il-popolazzjoni, nofs l-ideat jew nofs l-enerġija mhuwiex tajjeb biżżejjed. Bl-Istrateġija dwar l-Ugwaljanza bejn il-Ġeneri, qed nimbuttaw għal aktar progress biex nippromwovu l-ugwaljanza bejn l-irġiel u n-nisa.”
Il-Viċi President għall-Valuri u t-Trasparenza, Vera Jourová, qalet: “L-Ewropa hija post tajjeb għan-nisa, minkejja n-nuqqasijiet kollha. Hekk kif is-soċjetà tagħna għaddejja minn tranżizzjonijiet importanti, kemm jekk favur l-ambjent jew diġitali, irridu niżguraw li n-nisa u l-irġiel ikollhom opportunitajiet indaqs u li l-inugwaljanzi ma jiggravawx b’dawn it-tibdiliet. Għall-kuntrarju, irridu noħolqu kundizzjonijiet għan-nisa biex ikunu aġenti għal tranżizzjoni ġusta fix-xogħol u fil-ħajja privata.”
Il-Kummissarju għall-Ugwaljanza, Helena Dalli, qalet: “It-tfittxija għall-ugwaljanza ma teħtieġx iċ-ċaqliq minn basket għal ieħor. L-ugwaljanza hija riżorsa infinita, u hemm biżżejjed minnha għal kulħadd. Min-naħa l-oħra, id-diskriminazzjoni tiswa ħafna kemm għall-individwi li jsofruha kif ukoll għas-soċjetà kollha, fin-nuqqas ta’ rikonoxximent personali, nuqqas ta’ meritokrazija u telf ta’ talent u innovazzjoni. Bl-Istrateġija dwar l-Ugwaljanza bejn il-Ġeneri, qed inpoġġu l-ugwaljanza bejn il-ġeneri fil-qalba tal-iżvilupp tal-politika tal-UE. L-għan tagħna huwa li niżguraw li n-nisa ma jkollhomx bżonn jegħlbu ostakli addizzjonali biex jiksbu dak li l-irġiel għandhom għax kien mogħti lilhom u minflok ikunu jistgħu jilħqu l-potenzjal sħiħ tagħhom.”
L-Istrateġija tal-UE dwar l-Ugwaljanza bejn il-Ġeneri 2020-2025 tippreżenta għanijiet u azzjonijiet ta’ politika bil-għan li jinkiseb progress sostanzjali lejn l-ugwaljanza bejn il-ġeneri sal-2025. L-għan ewlieni huwa li jkollna Unjoni fejn in-nisa u l-irġiel, il-bniet u s-subien ikunu liberi li jsegwu t-triq magħżula tagħhom fil-ħajja u jkollhom opportunitajiet indaqs. L-istrateġija tuża approċċ doppju fejn l-integrazzjoni tal-ugwaljanza bejn il-ġeneri tingħaqad ma’ azzjonijiet speċifiċi oħra, filwaqt li l-intersezzjonalità tibqa’ prinċipju orizzontali għall-implimentazzjoni tagħha.
Il-prinċipji ewlenin għal din l-istrateġija huma:
- Li ttemm il-vjolenza bbażata fuq il-ġeneru
- Li tegħleb l-isfida kontra l-isterjotipi tal-ġeneru
- Li tnaqqas il-lakuna bejn il-ġeneri fis-suq tax-xogħol
- Li tikseb parteċipazzjoni ugwali f’setturi differenti
- Li tindirizza d-differenza fil-pagi u fil-pensjoni bejn il-ġeneri
- Li tindirizza d-differenza fil-kura bejn il-ġeneri
- Li tikseb bilanċ bejn il-ġeneri fit-teħid tad-deċiżjonijiet u fil-politika