Il-proġett Learning Exchanging and Integrating (LEI) – kien proġett kofinanzjat primarjament mill-Fond għall-Ażil, Migrazzjoni u Integrazzjoni (AMIF) għall-2014-2020 fdat f’idejn it-Taqsima għall-Affarijiet Interkulturali u Kontra r-Razziżmu fi ħdan id-Direttorat għad-Drittijiet tal-Bniedem. Il-proġett huwa parti mill-kisba tal-miri stabbiliti fl-Istrateġija u l-Pjan ta’ Azzjoni tal-gvern għall-Migrazzjoni u l-Integrazzjoni (Viżjoni 2020).

L-għanijiet ewlenin ta’ dan il-proġett kienu li:

• Jipprovdi appoġġ f’termini ta’ implimentazzjoni tal-istrateġija nazzjonali u pjan ta’ azzjoni għall-integrazzjoni tal-migranti.
• Jevalwa u jippreżenta rakkomandazzjonijiet dwar is-servizzi u l-faċilitajiet għall-migranti li huma disponibbli għall-pubbliku.
• Irawwem spirtu ta’ koperazzjoni reċiproka u spirtu ta’ fiduċja bejn il-komunitajiet immexxija mill-migranti u l-pajjiż ospitanti permezz ta’ diversi inizjattivi.

L-inizjattivi li ġejjin ġew iffinanzjati permezz tal-proġett:

• I Belong: Il-programm li huwa maqsum f’żewġ stadji, li jinkludi lezzjonijiet tal-Malti, l-Ingliż u l-orjentazzjoni kulturali li jipprovdi triq għall-integrazzjoni fis-soċjetà Maltija miftuħa għall-migranti kollha.
• Turning the Tables: Inizjattiva mmexxija minn migrant li ħarset lejn kwistjonijiet importanti relatati mal-integrazzjoni li wasslet għal tibdil fil-politika. Dan il-proġett ra l-integrazzjoni bħala impenn konġunt bejn l-individwi l-ġodda f’soċjetà partikolari, u l-pajjiż ospitanti – f’dan il-każ, Malta. Għal dan il-għan, l-għan tal-proġett kien li jrawwem sens ta’ setgħa u appartenenza lill-migranti fis-soċjetà tagħna. Dan sar permezz tal-organizzazzjoni ta’ konferenzi biex jiġu diskussi diversi suġġetti magħżula mill-komunitajiet ta’ migranti li jirrappreżentaw sfidi fil-ħajja ta’ kuljum tal-migranti. Is-suġġetti magħżula jinkludu:

• • L-edukazzjoni
  • Ix-xogħol
  • Id-dokumentazzjoni
  • Id-drittijiet politiċi
  • Id-detenzjoni
  • Il-governanza tal-integrazzjoni – It-Triq ‘il Quddiem
  • Inizjattivi mmexxija mill-migranti
  • Kompendju ta’ Rakkomandazzjonijiet

Kull suġġett ġie diskuss u żviluppat permezz ta’ grupp ta’ ħidma speċifiku waqt konferenza ta’ qabel il-konferenza ewlenija. L-għan ta’ dawn il-gruppi kien li jqajmu u jiddiskutu proposti ta’ politika li mbagħad ġew ippreżentati waqt il-konferenza ewlenija. Riċerkatur kien ukoll qed jiddokumenta dawn id-diskussjonijiet, segwiti minn żvilupp, dokumentazzjoni u finalment il-pubblikazzjoni. Dawn il-pubblikazzjonijiet jistgħu jintużaw ukoll bħala għodda ta’ promozzjoni.