Fit-13 ta’ Ottubru 2023, saret sessjoni ta’ ħidma online dwar l-abbozz preliminari tar-rapport ta’ valutazzjoni dwar is-“Sħubijiet”. Il-partijiet ikkonċernati Maltin ġew imħeġġa jattendu din is-sessjoni bħala parti mill-Proġett Konġunt dwar “Appoġġ lil Malta fit-tfassil u l-implimentazzjoni ta’ Strateġija nazzjonali ġdida Kontra t-Traffikar”. Il-proġett huwa kofinanzjat mill-Unjoni Ewropea permezz tal-Istrument ta’ Appoġġ Tekniku, u implimentat mill-Kunsill tal-Ewropa, f’kooperazzjoni mal-Kummissjoni Ewropea. Matul dan il-workshop, ir-rwol tal-Koordinatur Nazzjonali u r-Relatur Nazzjonali ġie deskritt fil-kuntest lokali. Saru wkoll diskussjonijiet dwar il-kooperazzjoni internazzjonali fl-investigazzjoni u l-prosekuzzjoni tat-traffikanti, il-prevenzjoni u l-ġlieda kontra t-traffikar tal-bnedmin kif ukoll il-protezzjoni, l-assistenza u r-ripatrijazzjoni tal-vittmi. Ingħataw preżentazzjonijiet mill-Korp tal-Pulizija ta’ Malta, l-FIAU u l-Uffiċċju tal-AG. Fil-livell tal-UE, Malta hija impenjata li tiskambja informazzjoni dwar investigazzjonijiet tat-traffikar tal-bnedmin fost il-forzi tal-pulizija permezz tas-sistemi tal-Interpol, l-Europol, l-Eurojust u s-SIRENE.