Id-direttiva għandha l-għan li tiżgura li l-bilanċ bejn il-ġeneri fil-bordijiet korporattivi ta’ kumpaniji elenkati jitjieb fl-UE kollha, filwaqt li tippermetti flessibbiltà għal Stati Membri li adottaw miżuri effettivi bl-istess mod. Din il-flessibbiltà tippermetti s-sospensjoni tar-rekwiżiti proċedurali stabbiliti fid-Direttiva.
Dispożizzjonijiet ewlenin tad-direttiva
Fil-qalba tad-direttiva l-ġdida hemm proċess trasparenti ta’ għażla tal-membri tal-bord ibbażat fuq kriterji ċari u tqabbil tal-kwalifiki tal-kandidati. Kumpaniji kbar elenkati fl-UE li ma jilħqux il-mira ta’ 40 % fost il-membri tal-bord li mhumiex eżekuttivi jew 33% fost id-diretturi kollha tal-ġens sottorappreżentat sat-30 ta’ Ġunju 2026 iridu jiżguraw proċeduri tal-għażla ġusti u trasparenti għall-għażla ta’ kandidati għal pożizzjonijiet fil-bord. Tali kumpaniji jkunu meħtieġa jagħmlu ħatriet ibbażati fuq analiżi komparattiva tal-kwalifika tal-kandidati billi japplikaw kriterji ċari, newtrali fir-rigward tal-ġeneru u mhux ambigwi, u jiżguraw li l-applikanti jiġu evalwati b’mod oġġettiv ibbażat fuq il-merti individwali tagħhom, irrispettivament mill-ġeneru.
Dan l-approċċ jirrispetta l-kwalifiki u l-merti tal-kandidati kollha bħala l-kriterji deċiżivi. Il-kriterji għall-pożizzjonijiet fil-bord għandhom jiġu stabbiliti mill-kumpaniji nfushom. L-adattabilità, il-kompetenza u l-prestazzjoni professjonali, mhux il-ġeneru, jibqgħu l-fatturi ewlenin għall-proċess tal-għażla. Biss meta żewġ kandidati għandhom l-istess kwalifiċi għandha ssir l-għażla favur is-sess li jkun sottorappreżentat.
Kumpaniji kbar elenkati fl-UE jridu wkoll jagħrfu impenji individwali biex jilħqu bilanċ bejn il-ġeneri fost il-membri tal-bord eżekuttivi tagħhom.
Kumpaniji li jonqsu milli jilħqu l-għan tad-direttiva jridu jirrapportaw ir-raġunijiet u l-miżuri li qed jieħdu biex jindirizzaw dan in-nuqqas.
L-Istati Membri jipprevedu pieni għall-kumpaniji li jonqsu milli jikkonformaw mal-obbligi tal-għażla u r-rappurtar. Dawn il-pieni għandhom ikunu effettivi, proporzjonati u dissważivi. Jistgħu jinkludu multi u nullità jew annullament tal-ħatra tad-direttur ikkontestat. L-Istati Membri huma meħtieġa jippubblikaw informazzjoni dwar kumpaniji li qed jilħqu l-miri, li sservi bħala pressjoni reċiproka li tikkomplementa l-infurzar.
L-Istati Membri għandhom jittrasponu d-Direttiva fil-liġi nazzjonali fi żmien sentejn – sat-28 ta’ Diċembru 2024.