Sors: Il-Kummissjoni Ewropea

X’inhi d-Differenza fil-Pagi bejn il-Ġeneri?

Hija d-differenza bejn il-paga grossa fis-siegħa bejn l-irġiel u n-nisa li jaħdmu. In-nisa jaqilgħu aktar minn 16% inqas mill-irġiel fis-siegħa fl-UE.

Fatti u ċifri

In-nisa fl-UE huma inqas preżenti fis-suq tax-xogħol mill-irġiel. Id-differenza fl-impjieg bejn il-ġeneri kienet ta’ 11%, b’68.2% tan-nisa fl-UE huma impjegati meta mqabbla mad-79.2% tal-irġiel.

Id-differenza fil-pagi bejn il-ġeneri fl-UE hija ta’ 16% u inbidlet biss minimament fl-aħħar għaxar snin. Dan ifisser li n-nisa jaqilgħu fuq medja ta’ 16% inqas fis-siegħa mill-irġiel.

Fl-2014, in-nisa fl-UE kienu jaqilgħu saħansitra 39.6% inqas mill-irġiel, b’mod ġenerali. Waħda mir-raġunijiet għal dan huwa l-fatt li fuq medja, in-nisa jqattgħu inqas sigħat f’xogħol imħallas mill-irġiel. Filwaqt li 8.7% biss tal-irġiel fl-UE jaħdmu part-time, kważi terz tan-nisa fl-UE (31.3%) jagħmlu dan.

Għaliex in-nisa jaqilgħu inqas?

Ir-raġunijiet għad-differenza fil-pagi bejn il-ġeneri jmorru lil hinn mill-kwistjoni sempliċi ta’ diskriminazzjoni. Huma konsegwenza ta’ diversi inugwaljanzi li n-nisa jiffaċċjaw fl-aċċess għax-xogħol, il-progressjoni u r-rikonoxximent.

Is-segregazzjoni settorjali: Madwar 30% tat-total tad-differenza fil-pagi bejn il-ġeneri tista’ tiġi spjegata bir-rappreżentazzjoni żejda tan-nisa f’setturi relattivament baxxi fil-pagi, bħall-kura u l-edukazzjoni. Min-naħa l-oħra, il-proporzjon ta’ impjegati rġiel huwa għoli ħafna (aktar minn 80%) f’setturi li jitħallsu aħjar, bħax-xjenza, it-teknoloġija, l-inġinerija u l-matematika (STEM).

Il-Bilanċ bejn ix-Xogħol u l-Ħajja: Fuq medja, in-nisa jqattgħu inqas sigħat f’xogħol imħallas mill-irġiel, iżda aktar sigħat f’xogħol mhux imħallas. B’kollox, in-nisa għandhom aktar sigħat ta’ xogħol fil-ġimgħa mill-irġiel, li jista’ jaffettwa l-għażliet tal-karriera tagħhom. Għalhekk l-UE tippromwovi sehem aktar ugwali tal-leave tal-ġenituri, provvediment pubbliku adegwat tas-servizzi ta’ kura tat-tfal u politiki adegwati tal-kumpaniji dwar arranġamenti flessibbli tal-ħin tax-xogħol.

‘Is-saqaf tal-ħġieġ’: Il-pożizzjoni fil-ġerarkija taffettwa l-livell tal-paga: Inqas minn 10% tal-Kapijiet Eżekuttivi tal-kumpaniji ewlenin huma nisa. Il-professjoni bl-akbar differenzi fil-pagi fis-siegħa fl-UE hija dik tal-maniġers: 23% ta’ dħul iktar baxx għan-nisa milli għall-irġiel.

Id-diskriminazzjoni: F’xi każijiet, in-nisa jaqilgħu inqas mill-irġiel għal xogħol tal-istess valur. Madankollu, il-prinċipju tal-paga ugwali għal xogħol tal-istess valur huwa stabbilit fit-Trattati Ewropej (artiklu 157 TFUE) mill-1957.

Differenzi bejn il-pajjiżi tal-UE

Hemm differenzi konsiderevoli bejn il-pajjiżi tal-UE. Id-differenza fil-pagi bejn il-ġeneri tvarja minn inqas minn 8% fil-Belġju, l-Italja, il-Lussemburgu, il-Polonja u r-Rumanija sa aktar minn 20% fir-Repubblika Ċeka, il-Ġermanja, l-Estonja u r-Renju Unit. F’ħafna pajjiżi, id-differenza fil-pagi bejn il-ġeneri qed tonqos, filwaqt li f’xi wħud qed tikber.