Il-Karta tad-Drittijiet Fundamentali tal-Unjoni Ewropea (il-Karta) tirrikonoxxi d-drittijiet fundamentali li jgawdu n-nies fl-Unjoni Ewropea (UE). Ġiet introdotta biex isaħħaħ il-protezzjoni tad-drittijiet fundamentali stabbiliti fi żminijiet differenti u b’modi differenti fl-Istati Membri tal-UE b’mod individwali, fit-Trattati tal-UE u fil-valuri u l-prinċipji universali. Hija għodda moderna u komprensiva li tipproteġi u tippromwovi d-drittijiet u l-libertajiet tan-nies fid-dawl tal-bidliet fis-soċjetà, il-progress soċjali u l-iżviluppi xjentifiċi u teknoloġiċi.
Artikolu 2 tat-Trattat dwar l-Unjoni Ewropea (TUE) jgħid li “L-Unjoni hija bbażata fuq il-valuri tar-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt u r-rispett għad-drittijiet tal-bniedem, inklużi d-drittijiet ta’ persuni li jagħmlu parti minn minoranzi. Dawn il-valuri huma komuni għall-Istati Membri f’soċjetà fejn jipprevalu il-pluraliżmu, in-non-diskriminazzjoni, it-tolleranza, il-ġustizzja, is-solidarjetà u l-ugwaljanza bejn in-nisa u l-irġiel.”
Il-Karta tapplika flimkien mas-sistemi nazzjonali u internazzjonali ta’ protezzjoni tad-drittijiet fundamentali, inkluż il-Konvenzjoni Ewropea dwar id-Drittijiet tal-Bniedem tal-Kunsill tal-Ewropa.
Il-Karta saret legalment vinkolanti fuq l-UE (u fuq l-Istati Membri tal-UE meta jimplimentaw il-liġi tal-UE) bid-dħul fis-seħħ tat-Trattat ta’ Lisbona, f’Diċembru 2009. Barra minn hekk, għandha l-istess valur legali bħat-TUE u t-Trattat dwar il-Funzjonament tal-Unjoni Ewropea (TFUE).
Fit-2 ta’ Diċembru 2020, il-Kummissjoni ppreżentat Strateġija ġdida biex issaħħaħ l-applikazzjoni tal-Karta tad-Drittijiet Fundamentali fl-UE.
Biex tiżgura li l-Karta issir realtà għal kulħadd, l-istrateġija tistabbilixxi d-direzzjoni tal-implimentazzjoni tal-Karta għall-10 snin li ġejjin.
L-istrateġija tiffoka fuq erba’ pilastri:
L-Aġenzija tal-Unjoni Ewropea għad-Drittijiet Fundamentali (FRA) tagħti pariri indipendenti lill-istituzzjonijiet tal-UE u lill-Istati Membri dwar id-drittijiet stabbiliti fil-Karta. FRA tagħmel ukoll riċerka legali kif ukoll riċerka dwar ix-xjenza soċjali biex tidentifika oqsma fl-UE fejn hemm bżonn aktar xogħol biex jintlaħqu l-istandards internazzjonali.