Il-Gvern nieda u implimenta l-Istrateġija Kontra r-Razziżmu 2021-2023, l-ewwel pjan ta’ azzjoni nazzjonali ta’ Malta kontra r-razziżmu u l-ksenofobija. L-Istrateġija ġiet adottata mill-Kabinett nhar l-Erbgħa 28 ta’ Lulju 2021, tnediet pubblikament nhar il-Ħamis 30 ta’ Settembru 2021, u ġiet ippreżentata lill-istakeholders f’konferenza nhar il-Ġimgħa 15 ta’ Ottubru 2021. Din l-Istrateġija komprensiva għandha l-għan li tikkonfronta u telimina r-razziżmu f’kull forma tiegħu, kemm individwali, sistemiku u kif ukoll soċjali u li tistimula u tappoġġja l-inklużjoni interkulturali.

Id-dokument inkorpora fi 22 miżura ideat siewja li ġew irċevuti matul il-konsultazzjoni pubblika tal-2020, li fiha r-rispondenti taw suġġerimenti fuq diversi kwistjonijiet bħal riċerka, l-infurzar tal-liġi, l-edukazzjoni, l-impjieg u l-akkomodazzjoni. Dawn il-miżuri joħolqu responsabbilitajiet individwali kif ukoll kollettivi għall-ġlieda kontra r-razziżmu u d-diskriminazzjoni fis-setturi kollha tas-soċjetà – il-Gvern u s-settur pubbliku, istituzzjonijiet demokratiċi u politiċi, il-midja, imma wkoll is-settur privat, is-soċjetà ċivili, u l-popolazzjoni ġenerali. Outreach u attivitajiet biex titqajjem kuxjenza saru wkoll matul is-snin u fil-livelli kollha tas-soċjetà, partikolarment qrib iċ-ċittadin.

Din l-Istrateġija hi f’konformità mal-Pjan ta’ Azzjoni tal-UE Kontra r-Razziżmu 2020-2025. Il-ħidma bdiet fuq it-Tieni Pjan ta’ Azzjoni Kontra r-Razziżmu.

L-ewwel rapport ta’ progress għall-2022 jista’ jinstab hawn.