It-Taqsima għall-Affarijiet Interkulturali u Kontra r-Razziżmu twaqqfet fl-ewwel xhur tal-2018 bħala t-taqsima ddedikata għall-integrazzjoni u l-affarijiet kontra r-razziżmu fi ħdan l-HRD. Hi tħares l-implimentazzjoni ta’ kuljum tal-istrateġiji relatati ma’ dan il-qasam, isservi bħala l-korp koordinatur  governattiv ewlieni li jgħaddi informazzjoni, jirċievi talbiet għall-integrazzjoni, jaħdem għal soċjetà antirazzista, u jsegwi l-progress tal-migranti fl-integrazzjoni tagħhom f’Malta.

L-istrateġiji joħolqu qafas għall-integrazzjoni ta’ suċċess  ta’ persuni li mhumiex Maltin fis-soċjetà permezz tal-livell ta’ sens ta’ appartenenza tagħhom fis-soċjetà Maltija u l-ispazju li s-soċjetà Maltija tippermetti għal ċerta integrazzjoni f’diversi setturi u strati. Dan isir ukoll bi skoraġġiment tar-razziżmu f’kull forma tiegħu fuq kull livell tas-soċjetà. Illum Malta hi pajjiż riċeventi f’termini ta’ flussi tal-migrazzjoni, u b’hekk qiegħda ssir etnikament, kulturalment u lingwistikament aktar diversa. Dan l-iżvilupp huwa sinkronizzat ma’ xejriet simili li nazzjonijiet żviluppati oħra esperjenzaw qabilna u huwa indikatur tal-iżvilupp ekonomiku u l-prosperità tal-pajjiż. L-akkomodazzjoni ta’ din id-diversità f’kull sfera tas-soċjetà tippreżenta kemm sfida u kif ukoll opportunità, li, jekk tiġi indirizzata b’mod tajjeb, tista’ twassal għal arrikkiment tas-soċjetà Maltija.

It-Taqsima titfa’ l-attenzjoni fuq kwistjonijiet u tħassib li tqajmu li mhumiex Maltin u migranti u l-organizzazzjonijiet rispettivi tagħhom, bil-għan li jinsabu soluzzjonijiet kif ukoll jassistu fl-iżvilupp tal-politika tal-Gvern f’dan il-qasam. Barra minn hekk, din it-Taqsima tagħmel l-aħjar użu mis-sorsi eżistenti ta’ finanzjament għall-avvanz ta’ servizzi, l-għoti ta’ taħriġ, l-attivitajiet biex titqajjem kuxjenza u t-tisħiħ tal-komunità.

It-Taqsima għall-Affarijiet Interkuluturali u Kontra r-Razziżmu hi l-punt ta’ dħul ta’ Malta għall-integrazzjoni tal-migranti peress li tfittex li tassisti lill-persuni kollha b’sfond ta’ migrazzjoni li jirrisjedu f’Malta u qegħdin fit-triq individwali tagħhom lejn l-integrazzjoni. F’dan is-sens, l-integrazzjoni tfisser li Malta bħala l-pajjiż ospitanti żżomm l-identità multidimensjonali u li qiegħda tevolvi f’dinja globalizzata. Dan ifisser ukoll li, minn issa ’l quddiem, l-identitajiet tan-nies tal-lokal u dawk ġodda fis-soċjetà se jkunu aktar minsuġa f’komunità antirazzista. Ir-rikonoxxenza u ċ-ċelebrazzjoni tad-diversità u l-promozzjoni tal-ugwaljanza mhumiex biżżejjed fihom infushom bħala qafas għall-integrazzjoni. Minflok, irridu niżguraw li persuni li mhumiex Maltin f’Malta għandhom vuċi, huma rikonoxxuti għall-valur veru tagħhom u kapaċi jibnu sens ta’ appartenenza fis-soċjetà. Huwa dan il-proċess li jippermettilna niżguraw soċjetà ġusta għal kulħadd, soċjetà li timmassimizza l-potenzjal ta’ kull individwu biex jinħolqu spazji għat-tisħiħ tal-komunità fuq livell lokali u dak nazzjonali għal dawk kollha li jsejħu lil Malta darhom.